Eitem Agenda

Noda’r Cyngor hwn y canlynol:

1. Mae parciau a mannau agored Caerdydd yn nodwedd bwysig o'r ddinas sy'n adnodd gwerthfawr ac yn lle diogel i drigolion ac ymwelwyr.  
2. Mae parciau'n fannau lle dylai unigolion a theuluoedd deimlo'n ddiogel ac yn ystod pandemig y Coronafeirws, roedd llawer o drigolion yn mwynhau ac yn gwerthfawrogi eu parc lleol i allu mynd allan. 
3. Mae nifer o grwpiau gwirfoddol, gan gynnwys grwpiau "Cyfeillion", sy'n gwneud cyfraniad gwerthfawr ac yn helpu i wella ein parciau. Mae'r Cyngor hwn yn diolch iddynt am eu gwaith caled. 
4. Mae gwaith ceidwaid parciau yn hanfodol er mwyn galluogi gwaith a wneir gan grwpiau Cyfeillion a sicrhau bod parciau Caerdydd yn ddiogel ac yn cael eu rheoli'n dda. 

Mae'r Cyngor hwn hefyd yn nodi y bu nifer fawr o ddigwyddiadau mewn parciau dros y misoedd diwethaf yn anffodus, yn amrywio o droseddau difrifol i ymddygiad gwrthgymdeithasol lefel isel. 

Mae'r Cyngor hwn yn galw ar y Cabinet i gyflwyno adroddiad sy'n cynnwys: 

• Cynyddu'r cyllid sydd ar gael i geidwaid parciau. Bydd mwy o geidwaid yn helpu i wneud ein parciau'n fwy diogel ac annog grwpiau Cyfeillion i ddatblygu. 
• Polisi ar ble a phryd y mae'n briodol cyflwyno goleuadau mewn parciau, a pha ymgynghori fyddai'n cael ei gynnal i nodi unrhyw lwybrau y mae angen eu goleuo. 
• Ystyried a ddylai'r Cyngor, ar ôl gofyn am gyngor gan yr Heddlu, gynnig gwobr am wybodaeth sy'n arwain at arestiadau pan fydd fandaliaeth ddifrifol yn digwydd mewn parciau. 

Dylid cyflwyno adroddiad o'r fath i'r Cabinet o fewn pedwar mis. 

Cynigiwyd: Y Cynghorydd Adrian Robson

Eiliwyd: Y Cynghorydd Lyn Hudson