Eitem Agenda

Cael y wybodaeth ddiweddaraf a monitro cynnydd o ran Perfformiad Ch1 y Gwasanaethau Plant

Croesawodd y Cadeirydd y Cynghorydd Graham Hinchey (Aelod Cabinet dros Blant a Theuluoedd), Sarah McGill (Cyfarwyddwr Corfforaethol, Pobl a Chymunedau) a Deborah Driffield (Cyfarwyddwr, Gwasanaethau Plant) i'r cyfarfod.

Gwahoddwyd y Cynghorydd Hinchey i wneud datganiad pan dalodd deyrnged i Swyddogion a staff y Gwasanaethau Plant am eu perfformiad yn ystod y pandemig, gan nodi bod nifer y plant sy'n cael eu dychwelyd adref wedi cynyddu.  Mae pwysau o hyd ac mae gwaith wedi parhau i ailfodelu'r gwasanaeth. 

Gofynnwyd i’r Aelodau wneud sylwadau neu ofyn cwestiynau am y wybodaeth a roddwyd. Mae’r trafodaethau hynny wedi eu crynhoi isod:

·         Trafododd yr Aelodau a fyddai modd ehangu Caerdydd ar Waith yn asiantaeth recriwtio ar gyfer gweithwyr cymdeithasol yn hytrach na defnyddio asiantaethau allanol. Dywedwyd wrth yr Aelodau nad oedd posibiliadau Caerdydd ar Waith wedi'u defnyddio'n llawn. Roedd y Cyngor wedi dechrau defnyddio'r gwasanaeth mewn perthynas â gweithwyr gofal ond nid oedd rheswm pam na ellid ehangu hynny i gynnwys amrywiaeth o staff eraill lle mae anawsterau recriwtio.  Mae'r cysyniad o ddatblygu staff y Cyngor ei hun yn mynnu eu bod yn cael eu recriwtio cyn-gymhwyso, a fydd yn golygu bod angen prentisiaethau a hyfforddeiaethau.  Mae angen cyfleoedd i weithwyr cymorth a chynorthwywyr gwaith cymdeithasol.  Mae'r rhain yn hanfodol er mwyn i'r Cyngor gael cronfa o bobl i'w datblygu a'u hyfforddi.  

·         Gofynnodd yr Aelodau am eglurhad ynghylch a oedd ymweliadau wyneb yn wyneb â phlant wedi dychwelyd i'r lefel yr oeddent cyn y pandemig, a'r hyn a ddysgwyd o brofiad ymweliadau rhithwir.  Dywedwyd wrth yr Aelodau y dylai ymweliadau wyneb yn wyneb fod ar lefelau cyn y pandemig cyn bo hir ond roedd rhywfaint o oedi oherwydd y galw.  Dywedwyd wrth yr Aelodau ymhellach fod tipyn wedi'i ddysgu o ymweliadau rhithwir. Yr hyn sy'n bwysig yw'r hyn sy'n gweddu fwyaf i'r person ifanc.  Roedd rhai pobl ifanc yn hapus iawn gyda chyswllt o bell tra bod eraill yn anhapus.  Mae gwahanol ffyrdd o ddefnyddio'r dechnoleg wedi cael eu harchwilio.  Ar ddechrau'r pandemig pan oedd ond yn bosibl ymweld â phlant sydd fwyaf mewn perygl, roedd pryder ei bod yn anodd bod yn sicr o'r sefyllfa wirioneddol i lawer o bobl heb fod mewn tai pobl.  I rai pobl ifanc, efallai y byddai'n bwysig cael gwybodaeth uniongyrchol am eu sefyllfa gartref 

·         Gofynnodd yr Aelodau am wybodaeth am unrhyw newidiadau ymarferol mewn perthynas â strategaethau atal, fel gwell cynadleddau perfformiad ac adolygu i blant ar y Gofrestr Amddiffyn Plant. Dywedwyd wrth yr Aelodau fod gweithwyr cymdeithasol yn dal i ymweld â phlant pan oedd angen neu'n ddiogel gwneud hynny yn ystod y pandemig.  Nid oedd y plant yn yr ysgol ac nid oedd canolfannau Blynyddoedd Cynnar ar agor.  Cynyddodd nifer y plant ar y Gofrestr fel ei bod yn anodd sicrhau eu bod yn cael eu gweld.  Cyflwynwyd Cydgysylltydd Cynhadledd Amddiffyn Plant ychwanegol i adolygu penderfyniadau yn gynnar.  O ganlyniad, bu gostyngiad sylweddol yn nifer y plant sy'n mynd ar y Gofrestr. 

·         Dywedwyd wrth yr Aelodau ymhellach fod canolfan adolygu yn cael ei chyflwyno a fydd yn caniatáu i staff ddeall yn well ble mae plant ar y llwybr a'u camu i fyny neu i lawr mewn ffordd amserol.  Mae gwaith ar y gweill i ddatblygu canolfannau ymyrraeth i ddarparu cymorth yn fewnol.  Mae cymorth cofleidiol yn cael ei gynyddu i atal plant rhag dod i ofal neu eu camu i lawr yn gyflymach.  Er bod pwysau sylweddol yn parhau mae'r Cyngor yn symud ymlaen gydag arloesedd a datblygiad, a fydd yn helpu i ddenu gweithwyr cymdeithasol.

·         Gofynnodd yr Aelodau am wybodaeth am dystiolaeth o berthynas rhwng cynyddu trais ymysg pobl ifanc a chamfanteisio'n rhywiol ar blant, ac a oedd digon o gydweithrediad gan bartneriaid i fynd i'r afael ag ef.  Dywedwyd wrth yr Aelodau fod y Cyngor wedi datblygu'r Model Diogel ar gyfer diogelu pobl ifanc rhag camfanteisio rhywiol neu droseddol.  Mae'r Model Diogel yn ceisio deall beth sy'n digwydd mewn gwahanol gymunedau a darparu cymorth cofleidiol i blant yn hytrach na'u gweld fel problem.  Mae'n caniatáu rhannu gwybodaeth am weithgareddau'r Heddlu a allai gael effaith ar blant.  Mae adolygiadau rheoli mewnol yn mynd rhagddynt i ddigwyddiadau treisgar difrifol a bydd y canlyniadau'n cael eu rhannu ar draws y partneriaid.

PENDERFYNWYD:

Bod y Cadeirydd yn ysgrifennu ar ran y Pwyllgor at yr Aelod Cabinet er mwyn cyfleu eu sylwadau a’u harsylwadau yn ystod y drafodaeth ar y ffordd ymlaen.