Eitem Agenda

Trafododd Aelodau ôl troed daearyddol ychydig yn anarferol Cydweithrediad Mabwysiadu’r Fro, y Cymoedd a Chaerdydd, yn arbennig gan ei fod nawr yn y Barri.  Hwn oedd y mwyaf o bum cydweithrediad rhanbarthol, ond gellid cynnig rhagor o wybodaeth yn crynhoi’r rheswm dros ôl troed rhanbarth y Fro, y Cymoedd a Chaerdydd.

Ceisiodd Aelodau ragor o wybodaeth am y swydd Cydlynydd Marchnata a Recriwtio a chawsant wybod bod y swydd wedi ei chreu er mwyn helpu i dracio a thrin yr ymholiadau, gyda'r nod o gynyddu’r nifer a ddaw yn geisiadau.  Roedd Aelodau’n bryderus o ddeall mai contract tymor penodedig yw hwn, ond mae cynnydd eisoes o ran y modd proffesiynol ac amserol y caiff hyn ei drin. Mae'n bwysig sicrhau, fodd bynnag, bod y broses yn drylwyr, yn dilyn yr ymholiad cyntaf. 

Cyfeiriodd Aelodau at y rhwystredigaeth ynghlwm â’r problemau ariannol a staffio pan gyflwynwyd adroddiad blaenorol a gofynnont a fu gwelliant o ran y materion hyn.  Dywedodd y Rheolwr bod yr Adolygiad Arfer Gorau wedi ei gomisiynu o ganlyniad i waith a wnaed i ystyried capasiti’r gwasanaeth; nid oedd yr adnodd yn ateb y galw. Clywodd Aelodau bod dwy swydd Gweithiwr Cymdeithasol wedi eu creu ers yr adolygiad. Er y bu trosiant staff mawr yn ddiweddar, nid yw'r adnodd ychwanegol wedi ei werthfawrogi'n llawn; fodd bynnag, mae'r Tîm Gwasanaeth Mabwysiadu yn fwy sefydlog oherwydd yr adnodd ychwanegol ac yn gallu ymdopi’n well â’r galw yn ogystal â gostwng rhestrau aros. 

Dywedodd Swyddogion ei bod yn hanfodol cadw’r capasiti dan arolwg o ran recriwtio mabwysiadwyr a chymorth mabwysiadu.  

Holodd Aelodau ynghylch hyblygrwydd yr hyfforddiant a roddir i fabwysiadwyr posibl a chawsant wybod ei bod yn bwysig denu ystod ehangach o fabwysiadwyr posibl.  Mae’r hyfforddiant yn gwrs tridiau, ond mae un arall undydd wedi ei ychwanegu oherwydd y gwahaniaeth amser rhwng y cwrs a’r proses.  Cynigir y cwrs dros benwythnos er mwyn ceisio helpu teuluoedd sy’n gweithio.  Mae cynlluniau i newid y rheoliadau yng Nghymru y flwyddyn nesaf er mwyn gwneud hon yn broses dau gam, sef deufis ar gyfer yr ymholiad, hyfforddiant a phrofion ac yna pedwar mis ar gyfer asesu.

Gofynnodd Aelodau a yw rhieni geni yn dod yn fwy o ran o’r broses a chawsant wybod bod hyn yn dal i fod yn her yn lleol ac yn genedlaethol.  Caiff pob plentyn ei ddyrannu i gyrchwr teulu a fydd yn rhoi cwnsela i’r rhieni geni, anfon llythyrau dienw a mynd i gartref y rhieni geni.  Bydd y tîm yn profi amryw ffyrdd o gyrraedd rhieni a allant fod yn teimlo'n drwm trwy'r broses.  Yn aml, bydd rhieni'n cysylltu â’r tîm wedi cwblhau proses yr achos llys.

Deallodd Aelodau er bod yn rhaid derbyn bod rhai lleoliadau wedi mynd i’r wal, mae’r nifer yn gymharol isel ac yn gymharol isel yn genedlaethol hefyd.