Eitem Agenda

Cynigiwyd gan y Cynghorydd Saeed Ebrahim

Eiliwyd gan y Cynghorydd Huw Thomas

Mae'r mis hwn yn nodi 4 blynedd ers trychineb T?r Grenfell pan gollodd 72 o bobl eu bywydau.

Gweithredodd Cyngor Caerdydd yn gyflym i sicrhau bod yr holl adeiladau uchel sy'n eiddo i'r Cyngor yn ddiogel, tra bod Llywodraeth Cymru hefyd wedi gweithredu i alluogi Landlordiaid Cymdeithasol Cofrestredig i wneud yr un peth.

Fodd bynnag, mae'r sefyllfa o ran blociau fflatiau uchel sy'n eiddo preifat heb ei datrys o hyd, ac mae'r sgandal cladin hefyd wedi amlygu diffygion eraill sy'n effeithio ar ddatblygiadau fflatiau uchel preifat, gan gynnwys absenoldeb adrannu tân priodol, yn ogystal â mesurau atal tân aneffeithiol eraill, a balconïau anniogel, gyda llawer o adeiladau, gan gynnwys yng Nghaerdydd, yn gofyn am gyfundrefnau gwyliadwriaeth gyson i sicrhau diogelwch preswylwyr mewn achos tân.

Mae cyflwyno ffurflenni EWS1, heb niferoedd digonol o beirianwyr cymwysedig i gynnal archwiliadau, wedi gwaethygu ymhellach y problemau a wynebir gan breswylwyr sy'n byw mewn llety blociau fflatiau uchel.

Mae'n amlwg bod y trefniadau hyn wedi effeithio ar les meddyliol y preswylwyr sydd, heb unrhyw fai arnynt hwy eu hunain, yn ansicr a yw eu cartrefi'n ddiogel, gan orfod oedi eu bywydau bob dydd. Maent hefyd yn wynebu effaith ariannol sylweddol, gyda phreswylwyr yn ei chael hi'n anodd cael yswiriant ar gyfer eu heiddo, perchen-feddianwyr yn syrthio i ecwiti negyddol ac yn methu gwerthu eu heiddo, a phreswylwyr yn wynebu'r posibilrwydd o orfod ariannu costau gwneud iawn diffygion i'w heiddo eu hunain, er iddynt brynu eu heiddo gyda phob ewyllys da.

Felly mae’r Cyngor hwn -

• Yn cymeradwyo'r egwyddor nad y Lesddeiliaid a greodd y problemau a nodwyd ac mae o’r farn na ddylent orfod talu i unioni'r materion hyn.
• Yn croesawu argymhellion Papur Gwyn Llywodraeth Cymru ar Ddiogelwch Adeiladu, ac yn galw am ei wneud yn ddeddfwriaeth cyn gynted â phosibl, gyda chymorth ychwanegol a ddarperir o ran cyllid ac adnoddau i gyflawni ei amcanion.
• Wrth wneud hynny, ond gan gydnabod yr amser sydd ei angen i baratoi deddfwriaeth, mae hefyd yn credu y dylid cymryd cyfres o gamau brys ar unwaith, gan gynnwys
  • Sefydlu Timau Archwilio ar y Cyd yn gyflym i gynnal archwiliad o adeiladau yr effeithir arnynt gyda chyllid ar gael i fynd i'r afael â'r diffygion a nodwyd
  • Buddsoddi i gynyddu argaeledd syrfewyr cymwysedig sy'n gallu cyhoeddi tystysgrifau EWS1.
  • Proses brofi garlam ar gyfer cladin newydd
• Yn galw ymhellach ar Lywodraeth Cymru a Llywodraeth y DU i weithio ar y cyd i gynnwys y datblygwyr yn hyn o beth fel y gellir creu pecyn ariannu ehangach i ddatrys y problemau sy'n parhau i effeithio ar fywydau preswylwyr mewn adeiladau blociau fflatiau uchel yng Nghaerdydd a ledled y DU. Mae’n gofyn i'r Cabinet archwilio sut y gellir dwyn i gyfrif y datblygwyr sydd â phroblemau cladin a rheoli adeiladu heb eu datrys yn well am eu rhwymedigaethau drwy bolisi cynllunio a gan Wasanaethau Rheoliadol a Rennir

Ac

• Mae’n gofyn ymhellach i'r Cabinet ystyried pa gymorth ychwanegol y gellid ei ddarparu i breswylwyr yr effeithir arnynt